nonain

I.

Nonain, voyez Nonnain.

II.

Nonain f. penac. dissyll. Est une fille, laquelle moyennant le voeu de chasteté, povreté, et autres à tel cas requis, est voilée avec plusieurs ceremonies par l'Abbesse du Monastere, auquel elle promet et doit tenir closture et vie religieuse à part, et sequestrée des personnes du siecle. On l'appelle aussi None, comme qui diroit Monain et Mone. Dont le terme Latinisé, Monialis nous advertit, car tous trois viennent de Monas, qui signifie unité, et est nombre de solitude, comme tous les autres nombres sont de societé et compagnie, dont vient {{t=g}}monos,{{/t}} qui signifie seul, et solitaire, et {{t=g}}monadzô,{{/t}} qui veut dire herberger et vivre seul, ainsi que {{t=g}}monakhos{{/t}} celuy qui habite en solitude. Laquelle solitude est entenduë à cause du lieu où elle fait et accomplit son voeu et saincte promesse (qui estoit anciennement et devroit estre en contrée et assiete champestre arriere des villes et bourgs, et solitaire, pour ne voir ce pourquoy la Nonain peut rebourser de coeur et avoir regard au monde qu'elle a quitté, et par ce moyen estre plus affectée et encline à la poursuite de sa saincte vie) et non à cause de la compagnie, veu qu'en un monastere les Nonains sont ordinairement en grand nombre, Monacha. Car quand à l'appeler Sacra, et Consecrata virgo, Tels mots ne font estat si n'est de la ceremonie observée quand elle est renduë religieuse. Elle est aussi appelée Religieuse, qui est un mot lequel comprend et le lieu et le voeu, et l'habit et l'exercice de religion, ausquels la Nonain s'est appliquée. Il y en a de maints et divers ordres, habits et reigles dissemblables.

Thresor de la langue françoyse. Jean Nicot.